1. grein.

Sjóðurinn heitir Vísindasjóður lyfjafræðinga.

2. grein.

Aðeins félagar í LFÍ geta sótt um styrk úr sjóðnum.

Rekstur sjóðsins og úthlutun úr honum er í höndum Sjóðastjórnar Vísinda- og Fræðslusjóðs lyfjafræðinga.

3. grein.

Vísindasjóður lyfjafræðinga er varasjóður í þeim tilvikum sem ekki er til nægjanlegt fé til úthlutunar úr Fræðslusjóði. Hlutverk sjóðsins er að styrkja vísinda- og rannsóknarstörf sem og sí- og endurmenntun lyfjafræðinga.

4. grein.

Tekjur sjóðsins eru:

  1. Framlag að tillögu stjórnar LFÍ til samþykktar á aðalfundi hverju sinni. Tekið er mið af stöðu Fræðslusjóðs hverju sinni.
  2. Gjafir og styrkir sem sjóðnum kunna að hlotnast.

5. grein.

Sjóðastjórn úthlutar úr sjóðnum ef Fræðslusjóður stendur ekki undir styrkgreiðslum það árið. Það fé sem ekki er úthlutað á árinu leggst við það fé sem kemur til úthlutunar á næsta ári. Sjóðastjórn er heimilt að úthluta öllu ráðstöfunarfé sjóðsins. Styrkþegar skulu birta greinargerð um verkefnin í Tímariti um lyfjafræði. Í tilfellum minni styrkja getur sjóðastjórn fallið frá kröfu um skil á greinargerð en styrkþegi skal þá skila inn afriti af reikningum vegna kostnaðar. Í ársskýrslu skal gerð grein fyrir úthlutun úr sjóðnum.

6. grein.

Endurskoðaðir reikningar skulu lagðir fram á aðalfundi Lyfjafræðingafélags Íslands.

7. grein.

Um breytingar á reglugerð þessari fer á sama hátt og um lagabreytingar Lyfjafræðingafélags Íslands.

8. grein.

Reglugerð þessi var samþykkt á aukaaðalfundi Lyfjafræðingafélags Íslands 5. desember 1999 og öðlast gildi 1. janúar 2000.  Með breytingum samþykktum á aðalfundi Lyfjafræðingafélags Íslands 23. mars 2010, breytingum samþykktum á aðalfundi félagsins 16. mars 2016 og með breytingum samþykktum á aðalfundi Lyfjafræðingafélags Íslands 20. mars 2019.